Agora

D Agora (altgriech. ἀγορά) isch im antike Griecheland dr zentrali Fest-, Versammligs- und Määrtblatz von ere Stadt gsi. Gliichzitig isch si aber au e bedütendi gsellschaftligi Instituzioon gsi und e charakteristischs Merkmol vo dr griechische polis. As wichdige Kultblatz si dört religiösi Fest mit gymnische und musische Agone abghalte worde, wo e gmäinsami Identidäät gstifdet häi. D Volks- und Grichtsversammlige si dört abghalte worde, wo s Mitenand in dr Stadt bestimmt häi. Wenn dr Homer verzelt, ass es nöime käi Agora gäb, isch das e Zäiche drfür, ass es dört käi Rächt und Gsetz git. Noch em Herodot isch d Agora für e Perserköönig Kyros II. s Merkmol von ere sälbstständige griechische Stadt gsi (Historien 1.153).

S bekanntiste Bischbil von ere Agora isch die vo Athen.